اتوار , 18 نومبر 2018

پی سی بی کی بی سی سی آئی کیخلاف ہرجانے کا کیس مضبوط بنانے کی کوششیں مزید تیز

لاہور: پاکستان کر کٹ بورڈ(پی سی بی) نے بی سی سی آئی کیخلاف ہرجانے کا کیس مضبوط بنانے کی کوششیں تیز کر دیں۔بھارتی کرکٹ بورڈ نے بگ تھری کی حمایت کے بدلے پاکستان سے2014میں 6باہمی سیریز کا معاہدہ کیا تھا.

اس دوران 2015سے2023تک14ٹیسٹ،30ون ڈے اور12ٹی 20میچز کھیلے جاتے، مگر بھارت نے اس وعدے کو وفا نہ کیا۔

بعد میں بگ تھری کا بھی خاتمہ ہوگیا۔پاکستان نے مالی خسارے کو جواز بناتے ہوئے رواں سال جنوری میں بھارتی بورڈ کیخلاف70ملین ڈالر زرتلافی کا کیس کیا تھا، جس میں برطانوی وکلا معاونت کر رہے ہیں، ان سے ملاقات کیلیے چیئرمین پی سی بی نجم سیٹھی جمعے کو لندن روانہ ہو گئے، وہاں سی او او سبحان احمد بھی معاونت کیلئے موجود رہیں گے،اس موقع پر کیس مضبوط بنانے کیلئے اقدامات پر تبادلہ خیال ہوگا۔

ذرائع نے بتایا کہ دونوں بورڈز نے تحریری بیانات جمع کرا دیے، اب ایک دوسرے سے کاغذات مانگے گئے ہیں، ان کا مطالعہ کرنے کے بعد جواب جمع کرائے جائیں گے، آئی سی سی کی تنازعات حل کرنے والی کمیٹی یکم سے 3 اکتوبر تک دبئی میں سماعت کے دوران کیس کا فیصلہ کرے گی،اس کیلیے مائیکل بیلوف کی سربراہی میں پینل تشکیل دیا جا چکا جس کے دیگر ارکان جان پولسن اور انابیل بینیٹ ہیں، ان کے فیصلے کو چیلنج نہیں کیا جا سکے گا اور دونوں بورڈز ماننے کے پابند ہوں گے۔ پی سی بی کو یقین ہے کہ فتح اسی کی ہوگی۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے