جمعرات , 21 مارچ 2019

ایف آئی اے نے یو اے ای میں مزید 96 پاکستانیوں کی جائیدادوں کا سراغ لگا لیا

اسلام آباد: وفاقی تحقیقاتی ادارے (ایف آئی اے) نے متحدہ عرب امارات میں مزید 96 پاکستانیوں کی جائیدادوں کا سراغ لگالیا۔

سپریم کورٹ میں چیف جسٹس پاکستان کی سربراہی میں پاکستانیوں کے بیرون ملک بینک اکاؤنٹس اور جائیدادوں سے متعلق کیس کی سماعت ہوئی جس سلسلے میں فیڈرل بورڈ آف ریونیو کے ممبر آڈٹ اور ڈی جی ایف آئی اے بشیر میمن بھی عدالت میں پیش ہوئے۔

بیرون ملک پاکستانیوں کی جائیدادیں: ایف بی آر سے ایک ماہ میں پیشرفت رپورٹ طلب

ایف آئی اے نے بیرون ملک پاکستانیوں کی جائیدادوں سے متعلق رپورٹ عدالت میں پیش کی جس میں بتایا گیا کہ متحدہ عرب امارات میں مزید 96 پاکستانیوں کی جائیدادوں کا سراغ لگالیا گیا ہے۔

ایف آئی اے رپورٹ کے مطابق یو اے ای میں جائیدادیں رکھنے والے پاکستانیوں کی تعداد 1211 ہوگئی ہے اور ان افراد کی متحدہ عرب امارات میں 2154 جائیدادیں ہیں۔

رپورٹ میں بتایا گیا ہےکہ مزید 341 لوگوں کو نوٹسز جاری کیے گئے ہیں، جائیداد رکھنے والے 61 افراد کی شناخت نہیں ہو سکی جب کہ ایک شخص مفرور، 5 محروم ہیں اور 10 ایف آئی اے سے تعاون نہیں کررہے۔

ایف آئی اے کی رپورٹ کے مطابق 97 افراد نے یو اے ای میں جائیداد سے لاتعلقی کا اظہار کیا ہے اور 167 افراد کے خلاف انکوائری بند کردی گئی ہے جب کہ 79 افراد نے ایف بی آر کے پاس اپنے ٹیکس ریٹرن جمع کرائے ہیں۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے