پیر , 13 جولائی 2020

میشاشفیع کے الزامات سے مجھے ذہنی، نفسیاتی اور مالی نقصان پہنچا، علی ظفر

لاہور: نامور پاکستانی گلوکار و اداکار علی ظفر نے کہا ہے کہ میشا شفیع کے الزامات کی وجہ سے مجھے اور میرے خاندان کو ذہنی، نفسیاتی اور مالی طور پر نقصان پہنچا لہٰذا عدالت سے استدعا ہے کہ اس کیس کا فیصلہ جلد سے جلد سنایاجائے۔

گلوکار علی ظفر نے لاہور میں مقامی عدالت کے باہر میڈیا سے گفتگو کرتے ہوئے کہا ظلم کرنے سے زیادہ ظلم سہنا زیادہ بڑاگناہ ہے مجھے عدالت نے بلایا نہیں تھا میں خود عدالت آیا ہوں۔ جس کو بلایا جا رہا ہے، وہ عدالت نہیں آ رہی اور جس کو نہیں بلایا جا رہا، وہ خود عدالت آرہا ہے۔ جو حق سچ پر ہوتا ہے، وہ بن بلائے عدالت میں آتا ہے جھوٹا عدالتوں کے بلانے پر بھی عدالتوں میں نہیں آتا مجھ پر جھوٹا الزام لگایا گیا ہے۔

علی ظفر نے کہا سوشل میڈیا پر جعلی اکاؤنٹس بنا کر میرے خلاف پراپیگنڈہ کیا جا رہا ہے۔ اپنے ذاتی مفاد کے لئے شریف بندے پر الزام لگایا گیا ہے، ہم نے اس کے خلاف ایف آئی اے سے بھی رجوع کیا ہے کیونکہ یہ سائبر بلنگ اور سائبر کرائم کے زمرے میں آتاہے۔
اس خبرکوبھی پڑھیں: میشا شفیع کا ایک بار پھر علی ظفر پر جنسی ہراسانی کاالزام

علی ظفر نے کہا میں یہ دیکھ کر حیران رہ گیاہوں، میری آنکھیں کھل گئی ہیں کہ کس طرح چیزیں ہورہی ہیں، کوئی بھی ایک بے گناہ اور شریف آدمی کو جس نے20 سال لگا کر عوام کو تفریح فراہم کی، اپنے فن کے ذریعے لوگوں میں پیار بانٹا اور عزت کمائی، کیا کل کو کوئی بھی اٹھ کے اپنے ذاتی مفاد کے لیے ٹوئٹر اور سوشل میڈیا پراس شخص پرالزامات لگائے اور خود امیگریشن کے لئے درخواست دے کر بیرون ملک چلا جائے کیا اس کی اجازت دی جانی چاہئے۔

علی ظفر نے کہا جس خاتون نے مجھ پر الزامات لگائے اس کے پیچھے ان کی نیت کیا تھی یہ تو اللہ بہتر جانتا ہے لیکن جو حقائق سامنے آئے ہیں اس سے ظاہر ہوتا ہے کہ یہ سب کچھ مکمل منصوبہ بندی سے مجھے ٹارگٹ کرکے اور اپنے ذاتی مفاد کے لیے کیاگیا، اس کے پیچھے ان کا کیا مقصد تھا مجھے اس بارے میں نہیں معلوم۔

اس خبرکوبھی پڑھیں: جنسی ہراسانی معاملہ؛ وجہ تنازع بننے والی ویڈیو منظرعام پر

گلوکار علی ظفر نے مزید کہا میشا شفیع کا اصل کیس مسترد ہو چکا ہے، اس کی اپیل بھی مسترد ہو چکی ہے تو قانون کی نظر میں میں بے گناہ ہوں، یہ اب ہتک عزت کا کیس ہے جس کا میں نے دعویٰ دائر کر رکھا ہے۔ میشا شفیع کے ان الزامات کی وجہ سے مجھے اور میرے خاندان کو ذہنی، نفسیاتی اور مالی طور پر نقصان پہنچا لہٰذا اب وہ میرے نقصان کا ازالہ کریں۔

گلوکار نے کہا ایک سال سے کیس چل رہا ہے، ہمارے گواہان 8 بار عدالتوں میں آکر واپس جا چکے ہیں۔ جان بوجھ کر کیس میں تاخیر کی جارہی ہے، لہذٰا میری عدالتوں سے استدعا ہے کہ اس کیس کا فیصلہ جلد از جلد سنایا جائے تاکہ میرا سچ اور خاتون کا جھوٹ سامنے آئے اور میں میشا شفیع اور ان کے وکلا سے گزارش کرتا ہوں کہ عدالت آکر کیس کا سامنا کریں۔

اس خبرکوبھی پڑھیں: علی ظفر نے میشا شفیع کو 100 کروڑ کا لیگل نوٹس بھجوا دیا

واضح رہے کہ گزشتہ برس میشا شفیع نے علی ظفر پر جنسی ہراسانی کا الزام عائد کرتے ہوئے کہا تھا کہ علی ظفر نے انہیں ایک بار نہیں کئی بار ہراساں کیا ہے جس کے جواب میں علی ظفر نے میشا شفیع پر ہتک عزت کا دعویٰ دائر کرتے ہوئے انہیں ایک ارب ہرجانے کا نوٹس بھجوایاتھا۔

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے